Tá éileamh mhór ar an albam is déanaí ón amhránaí John Spillane, ‘Irish Songs We Learned At School’, albam atá ar bharr mo liosta de bhronntanais Nollag i mbliana.
Roinnt blian ó shin bhí banna ceoil á chur le cheile mar chuid de scig chlár a bhí á chraoladh ar TG4. RíRá ab ainm don clár ach ní cuimhin liom ainm an bhanna féin. Bhí sé i gceist acu a leagan den Poc Ar Buile a éisiúint in am don Nollag – níor tharla sé. Anois tá An Poc Ar Buile ar fáil, leagan nua agus John Spillane in éineacht le páistí ó Ghaelscoil Uí Riordáin i mBaile An Chollaigh ag ceol air, Seán Ó Sé agus Peadar Ó Riada ag canadh agus ag tionlacan le cois. Cá bhfios ach go sroichfeadh an amhrán a chum Dónal Ó Mulláin barr na gcairteacha go fóill!
Is breá liom a leitheid a fheiscint. Tá súil agam go mbeidh díol mór ar an albam agus is cinnte go bhfuil speis ann nó bhí John ar Tubridy Tonight oíche Dé Satharn agus é ag canadh amhrán nó dhó ón albam. Chuala é ag canadh Óró Sé Do Bheatha Bhaile – cé gur chuir an lúdramán ó Chontae na Mí, Hector Ó Heochagáin, a véarsa féin leis ag an deireadh – agus bhí gach duine sa lucht éisteachta ag ceol ina theannta.
Tá go leor déanta ag John Spillane ar son na Gaeilge, nó is leathchuid é le Louis de Paor de Monarcan Bhuillí na Gaeilge, gan trácht ar na h-amhráin a chum sé féin. Táim ag súil go mór le cluas a thabhairt le h-eisteacht don albam seo….
[Níl aon físeán ar fáil go fóill ó Tubridy Tonight – mar sin beidh orainn déanamh leis an bpíosa seo agus John ag ceol Beidh Aonach Amarach ag Club Sult anuraidh uair eigean! Chomh luath is a bhionn sliocht ar fáil ó Tubridy, beidh sé againn anseo!]
Dála an scéil, niorbh é sin an t-aon uair a chualathas amhrán an Phiarsaigh ar an dteilifís i gcaitheamh na deireadh seachtaine nó canadh é freisin i The Wind That Shakes The Barley, scannán iomráiteach Ken Loache, scannán a deineadh furmhór mhór de anseo i Múscraí. Craoladh TWTSTB ar TV3 oíche Dé Domhnaigh – an rud is annamh is íontach, an Ghaoluinn a chlos ar TV3!
iMúscraí 